Genesis 19:1 αυὶ δε `νϫε πιαγγελος 2. ὲ`ρϩηι ὲςοδομα `μ`φναυ `νρουϩι λωτ δε ναϥϩεμςι ϧατεν ϯπυλη `ντε ςοδομα `ὲταϥναυ δε `νϫε λωτ αϥτωνϥ ὲβολ ὲ`ϩραυ ουοϩ αϥουωϣτ ϩιϫεν πεϥϩο ϩιϫεν `πκαϩι .
Genesis 19:2 ουοϩ πεϫαϥ ϫε παϭοις ρικι ὲ`πηι `μπετενὰλου ουοϩ `μτον `μμωτεν ουοϩ ια νετενϭαλαυϫ ουοϩ ϣερπ θηνου μαϣενωτεν ὲπετενμωιτ ὲ`φμα ϫε αρετενρικι ϩα πετενὰλου ουοϩ πεϫωου ϫε `μμον αλλα τενναεμτον `μμον ϩι πιϣθεϩ .
Genesis 19:3 ουοϩ ναϥϭι `μμωου `νϫονς πε ουοϩ αυρικι ϩαροϥ ουοϩ αυϣενωου ὲϧουν ὲπεϥηι ουοϩ αϥὶρι `νουςω ὲρωου ουοϩ ϩανατϣεμηρ αϥφαςου νωου ουοϩ αυουωμ `μπατουνκοτ .
Genesis 19:4 ουοϩ νιρωμι `ντε ϯβακι νιρεμςοδομα αυκωϯ ὲπιηι ιςϫεν ουϧελϣιρι ϣα ουϧελλο πιμηϣ τηρϥ ευςοπ .
Genesis 19:5 ουοϩ ναυμουϯ ὲλωτ ὲβολ ευϫω `μμος ναϥ ϫε αυθων νιρωμι ὲταυὶ ὲϧουν ϩαροκ `νϫωρϩ ανιτου ὲβολ ϩαρον ϩινα `ντενϣωπι νεμωου.
Genesis 19:6 αϥὶ δε ὲβολ ϩαρωου `νϫε λωτ αϥòϩι ὲρατϥ ϧατεν πιρο ετςαβολ αϥςεκ πιρο δε ϩιφαϩου `μμοϥ .
Genesis 19:7 πεϫαϥ δε νωου ϫε `μφωρ ναςνηου `μπερὶρι `μπαιπετϩωου .
Genesis 19:8 ουονϯ ϣερι `ςνουϯ `μμαυ `μπατουςουεν ϩαι ειὲενου ὲβολ ϩαρωτεν ουοϩ ὰριουὶ νωου `μ`φρηϯ εθρανωτεν μονον ναιρωμι `μπερϭιτου `νϫονς ὲ`φμα ϫε αυὶ ὲϧουν ϧα θουαϩςοι `μπαηι .
Genesis 19:9 πεϫωου δε ϫε ὰμου ὲβολ `μμαυ ὲτακὶ ὲϣωπι μη ὲϯϩαπ `νουϩαπ ϯνου ουν τεννατϩεμκοκ μαλλον ὲϩοτε νη ουοϩ ναυϭι `μπιρωμι ϫε λωτ `νϫονς πε ὲμαϣω ουοϩ αυϧωντ εκαϣ πιρο .
Genesis 19:10 νιρωμι δε αυςουτεν νουϫιϫ ὲβολ ουοϩ αυςεκ λωτ ϩαρωου ὲϧουν ὲπιηι ουοϩ αυ`ϣθαμ `μ`φρο `μπιηι .
Genesis 19:11 νιρωμι δε ὲναυ ϩιρεν `φρο `μπιηι αυϣαρι ὲρωου ϧεν ουμετβελλε ιςϫεν ουκουϫι ϣα ουνιϣϯ ουοϩ αυβωλ ὲβολ ευκωϯ `νςα πιρο.
Genesis 19:12 πεϫε νιρωμι δε `νλωτ ϫε ουοντακ ουϩλι `μπαιμα ϩανϣομ ιε ϩανϣηρι ιε ϩανϣερι ιε κεουαι `ντακ ϧεν ταιβακι ὰνιτου ὲβολ ϧεν παιμα.
Genesis 19:13 ϫε ανον τεννατακοϥ ϫε ὰπουϧρωου αϥϭιςι `μπε`μθο `μ`πϭοις ουοϩ αϥταουον `νϫε `πϭοις εϥωϯ `νταιβακι ὲβολ .
Genesis 19:14 αϥὶ δε ὲβολ `νϫε λωτ ουοϩ αϥςαϫι νεμ νεϥ`ϣμωου νη ὲταυϭι `ννεϥϣερι ουοϩ πεϫαϥ νωου ϫε τενθηνου ὰμωινι ὲβολ ϧεν παιμα ϫε `φνουϯ ναϥετ ταιβακι ὲβολ αυμευι δε ϫε αϥςωβι `μπε`μθο `ννεϥ`ϣμωου .
Genesis 19:15 αςϣωπι δε ὲτα `τοουὶ ϣωπι ναρε νιαγγελος ιης `νςα λωτ ευϫω `μμος ϫε τωνκ ϭι `ντεκ`ςϩιμι νεμ τεκϣερι `ςνουϯ ὲτεντακ ουοϩ ὰμου ὲβολ ϩινα `ντεκ`ϣτεμτακο ϩωκ ϧεν νιανομια `ντε ταιβακι .
Genesis 19:16 ουοϩ αυ`ϣθορτερ ουοϩ ὰ νιαγγελος ὰμονι `ντεϥϫιϫ νεμ `τϫιϫ `ντεϥ`ςϩιμι νεμ νενϫιϫ `ντε νεϥϣερι `ςνουϯ ϧεν `πϫιντε `πϭοις ϯὰςο ὲροϥ ουοϩ αϥενϥ ὲβολ `νϫε `πϭοις αυχαϥ ςαβολ `νϯβακι .
Genesis 19:17 ουοϩ αςϣωπι ὲταϥενϥ ὲβολ πεϫαϥ ϫε ϧεν ουνοϩεμ νοϩεμ `ντεκψυχη ουοϩ `μπερϫουϣτ ὲφαϩου ουοϩ `μπερòϩι ὲρατκ ϧεν ϯπεριχωρος τηρς αλλα ναϩμεκ ὲ`πτωου μηποτε `ντουταϩοκ `νϫε νιπετϩωου .
Genesis 19:18 πεϫε λωτ δε νωου ϫε ϯϯϩο ὲροκ παϭοις .
Genesis 19:19 ὲπιδη ὰ πεκὰλου ϫεμ ουναι `μπεκ`μθο ουοϩ ακ`θρε τεκμεθμηι ερνιϣϯ πετεκνααιϥ νεμηι εθρε ταψυχη ωνϧ ὰνοκ δε `μμον `ϣϫομ `μμοι ὲναϩμετ ὲ`πτωου μηποτε `ντουταϩοι `νϫε νιπετϩωου ουοϩ `νταμου.
Genesis 19:20 ϩηππε ις ταιβακι ϧεντ εθριφωτ ὲμαυ ὲτε ουκουϫι τε ουοϩ εςὲωνϧ `νϫε ταψυχη .
Genesis 19:21 ουοϩ πεϫαϥ ναϥ ϫε ϩηππε αιερ`ϣφηρι `μπεκϩο νεμ ὲ`ρϩηι ὲϫεν παικεςαϫι ὲ`ϣτεμρωϧτ `νταιβακι θηὲτακςαϫι ὲϫως .
Genesis 19:22 ιης ουν `μμοκ εθρεκναϩμεκ ὲμαυ `ννα`ϣϫεμϫομ γαρ ὲὶρι `νουϩωβ ϣατεκναϩμεκ ὲϧουν ὲμαυ εθβεφαιαυϯ`φραν `νϯβακι ϫε ςηγωρ .
Genesis 19:23 ουοϩ ὰ `φρη ϣαι ϩιϫεν πικαϩι ουοϩ ὰ λωτ ϣεναϥ ὲϧουν ὲςηγωρ.
Genesis 19:24 ουοϩ ὰ `πϭοις ϩωου `ὲϫεν ςοδομα νεμ γομορρα `νουθηου νεμ ου`χρωμ ὲβολ ϩιτεν `πϭοις ὲβολ ϧεν `τφε .
Genesis 19:25 ουοϩ αϥουωϫπ `ννιβακι νεμ νιμα`νϣωπι τηρου ὲτε`μμαυ νεμ ουον νιβεν ετϣοπ ϧεν νιβακι νεμ ϩωβ νιβεν ετρητ ὲ`πϣωι ὲβολ ϧεν `πκαϩι .
Genesis 19:26 ουοϩ ὰ `τ`ςϩιμι `ντε λωτ ϫουϣτ ὲφαϩου αςερ ουθουοϯ `ν`ϩμου .
Genesis 19:27 αϥϣορπϥ δε `νϫε αβρααμ `νϩανατοουὶ ὲπιμα ὲναϥòϩι ὲρατϥ `μμοϥ `μπε`μθο `μ`πϭοις .
Genesis 19:28 ουοϩ αϥϫουϣτ ὲϫεν `πϩο `νςοδομα νεμ γομορρα νεμ ὲϫεν `πϩο `μ`πκαϩι `ντε ϯπεριχωρος ὲτε`μμαυ ουοϩ αϥναυ ουοϩ ϩηππε ναϥνηου ὲ`πϣωι `νϫε ουϣαϩ ὲβολ ϧεν `πκαϩι `μ`φρηϯ `νουατμις `ν`ϩρω.
Genesis 19:29 ουοϩ αςϣωπι ϧεν `πϫιν`θρε `πϭοις φενϫ νιβακι τηρου `ντε νιμα`νϣωπι ουοϩ ὰ `φνουϯ ερ`φμευι `ναβρααμ ουοϩ αϥεν λωτ ὲβολ ϧεν `θμηϯ `μπιουωϫπ ϫε νε ὰ `πϭοις ρεϧτ νιβακι πε νη εναρε λωτ ϣωπι `νϧητου .
Genesis 19:30 αϥὶ δε ὲ`πϣωι `νϫε λωτ ὲβολ ϧεν ςηγωρ ουοϩ ναϥϩεμςι πε ϩιϫεν πιτωου `νθοϥ νεμ τεϥϣερι `ςνουϯ νεμαϥ αϥερϩοϯ γαρ ὲϣωπι ϧεν ςηγωρ ουοϩ αϥϣωπι ϧεν πιβηβ `νθοϥ νεμ τεϥϣερι `ςνουϯ νεμαϥ.
Genesis 19:31 πεϫε ϯνιϣϯ δε `νϯκουϫι ϫε πενιωτ αϥερϧελλο ουοϩ `μμον `ϩλι ϩιϫεν πικαϩι εϥναι ϩαρον `μ`φρηϯ ὲτε `ςθηϣ `μπικαϩι τηρϥ .
Genesis 19:32 αμη μαρεν`τςε πενιωτ `νουηρπ ουοϩ `ντεν`νκοτ νεμαϥ ουοϩ `ντεντουνος ου`ϫροϫ ὲβολ ϧεν πενιωτ .
Genesis 19:33 αυ`τςε πουιωτ δε `νουηρπ ϧεν πιὲϫωρϩ ὲτε`μμαυ ουοϩ αςὶ ὲϧουν `νϫε ϯνιϣϯ ουοϩ ας`νκοτ νεμ πεςιωτ `μπιὲϫωρϩ ὲτε`μμαυ ουοϩ ναϥὲμι αν πε ϧεν `πϫιν`θρες`νκοτ ουοϩ `ντεςτωνς.
Genesis 19:34 αςϣωπι δε `μπεϥραςϯ πεϫε ϯνιϣϯ `νϯκουϫι ϫε ϩηππε αιενκοτ `νςαϥ νεμ παιωτ μαρεν`τςοϥ `νουηρπ ϧεν παικεὲϫωρϩ ουοϩ μαϣενε ὲϧουν `νκοτ νεμαϥ ουοϩ `ντεντουνος ου`ϫροϫ ὲβολ ϧεν πενιωτ .
Genesis 19:35 αυ`τςε πουιωτ δε `νουηρπ ϧεν πικεὲϫωρϩ ὲτε`μμαυ ουοϩ αςὶ ὲϧουν `νϫε ϯκουϫι αςε`νκοτ νεμ πεςιωτ ουοϩ ναϥὲμι αν πε ϧεν `πϫιν`θρες`νκοτ ουοϩ `ντεςτωνς .
Genesis 19:36 ουοϩ αυερβοκι `νϫε ϯϣερι `ςνουϯ `ντε λωτ ὲβολ πουιωτ .
Genesis 19:37 ουοϩ αςμιςι `νϫε ϯνιϣϯ `νουϣηρι αςϯρεν πεϥραν ϫε μωαβ εςϫω `μμος ϫε ὲβολ ϧεν παιωτ πε φαι πε `φιωτ `ννιμωαβιτης ϣα ὲϧουν ὲφοου `νὲϩοου .
Genesis 19:38 αςμιςι δε `νϫε ϯκεκουϫι `νουϣηρι ουοϩ αςϯρεν πεϥραν ϫε αμμαν ϫε `πϣηρι `μπαγενος φαι πε `φιωτ `ννιαμμανιτης ϣα ὲϧουν ὲφοου `νὲϩοου .